Неимар веќе еден месец се рехабилитира од последната повреда. Бразилскиот интернационалец се повреди за време на куп пресметката против екипата на Стразбур, а лекарскиот преглед покажа дека станува збор за скршеница на метатарзалната коска во десното стапало. Иако беше предвидена операција, Неимар реши да се рехабилитира со помош на специјална терапија која е богата со плазма од тромбоцити и матични клетки.
Ѕвездата на актуелниот шампион на Франција, тимот на ПСЖ, откри дека се чувствувал ужасно кога дознал дека мора да паузира 10 недели.
- Оваа повреда е покомплицирана од претходната. Тогаш си кажав дека морам да се вратам што е можно побрзо. Поради СП во Русија. Сега, многу потешко ја прифатив целата ситуација. Плачев два дена. Рехабилитацијата само што почна. Ова ќе биде едно долго патување и ќе имам многу помали победи секој ден. Тешко е да се биде надвор од фудбалскиот терен, да се биде надвор од секојдневната рутина, далеку од навивачите. Претходната повреда ме направи посилна и поподготвен, изјави Неимар.
Бразилецот ќе го пропушти и реванш 1/8 финалниот дуел од Лигата на шампиони против екипата на Манчестер Јунајтед, а според лекарските проценки, Неимар би требало да биде подготвен за 1/4 финалните дуели доколку ПСЖ обезбеди пласман во следната елиминациска рунда.
