Владата на Перу денеска прогласи еколошка вонредна состојба во северната крајбрежна област, каде што државната нафтена компанија Петроперу минатиот викенд истури пратка сурова нафта во околните води на Тихиот Океан.
Брод кој изведуваше маневри предизвика излевање нафта во саботата на терминалот на перуанската рафинерија Талара на северот на Перу, објави Ројтерс.
„Петроперу“ не кажа колку сурова нафта се излеа во морето, но организацијата за заштита на животната средина на Перу, ОЕФА, во прелиминарниот извештај рече дека излевањето погодило околу 10.000 квадратни метри површинска морска вода, а Министерството за животна средина соопшти дека погодило најмалку седум плажи. како и локалниот див свет.
Министерството за животна средина на Перу соопшти дека 90-дневната вонредна состојба има за цел „да гарантира одржливо управување со областа и спроведување на работи за обновување и рехабилитација за ублажување на контаминацијата на животната средина“.
Локалните власти соопштија дека излевањето ги оштетило крајбрежните растенија и животни како што се раковите, додека рибарите рекоа дека излевањето ги спречило да работат.
„Петроперу“ вчера објави дека распоредила екипи за чистење од моментот на излевањето и дека се координирала со синдикатот на рибарите и локалните власти за да може нормално да продолжат локалните економски и туристички активности, пренесува Танјуг.
