Најдобриот македонски кошаркар и сегашен прв човек на Македонската кошаркарска федерација, Перо Антиќ, даде интервју за магазинот „Елевит“ во кое откри многу работи поврзани за себе, но и за трофејниот тренер Жељко Обрадовиќ, со кој ја освои титулата во Евролига во 2017 година, со тимот на Фенербахче.
Обрадовиќ девет пати ја освојуваше Евролигата, Перо Антиќ има три европски титули, а во неодамнешно интервју за ВЕЧЕР истакна дека се уште се добри пријатели, па често знаат да се „слушнат“ на телефон.
- Имаме одлични односи, постојано се слушаме, но не разговараме на темата Партизан – Црвена звезда. Жељко е генерал два часа, сакаш да го убиеш, а откако ќе сфатиш дека тој со тоа сака да ти помогне, си уште поблагодарен во наредните 22 часа. Бил секогаш со нас и за семејството, и за што било друго да ни било потребно, за совети, за разбирање… Човекот има девет титули во Евролигата, неколку милиони на сметка, опседнат е со кошарка. Доаѓа на терен и веднаш црта акции, што покажува за каков човек се работи, изјави Антиќ за ВЕЧЕР.
Овој пат, тој призна дека собиранките со одредено друштво му се омилени, а „слаба точка“ му е кршењето чаши.
- Сакам ресторани, барови, не сакам дискотеки. Сакам да седам со избрана група луѓе, малку да поразговараме, пееме, многу се смееме. Имам омилена песна од Синан Сакиќ: „Да се родам повторно“ (Да се опет родим). И јас сакам да кршам чаши. Мераклија“, изјави Антиќ во интервју за „Елевит“.
Претседателот на МКФ раскажа и што еднаш му кажал искусниот стручњак.
- Не би променил ништо ако повторно се родам. Жељко Обрадовиќ еднаш ми рече: „Како живееш, така и ќе умреш“. Секогаш се придржувам на ова, но ако нешто ми штети, одма менувам, ако не го работам двапати повеќе, тоа е моето мото, додава Антиќ.
Поранешниот кошаркар на Црвена звезда помина и две сезони во НБА лигата, настапувајќи за Атланта.
- НБА и Европа, небо и земја. Ова е Балкан, знаете што слушаме од трибините и кога оди и кога не оди, луѓето се темпераментни. Во НБА се е опуштено и подредено на играчите, се е на услуга на кошаркарите, за да бидат задоволни. Единствена и најголема желба ми беше да играм во НБА и тоа го постигнав, заврши Антиќ.
