Поради повреда на менискусот, Новак Ѓоковиќ мораше да се повлече од годинашниот Ролан Гарос. Ден по повредата му беше извршена магнетна резонанца и веднаш беше закажана операција, која помогна да се забрза закрепнувањето на најдобриот тенисер на сите времиња. Францускиот физиотерапевт Жан-Жорж Селиер бил избран да го придружува српскиот тенисер при враќањето на теренот.
Иако купил авионски билети за Маракеш, каде што требало да работи со двајца фудбалери од француската Лига 1 за закрепнување од повредите на коленото, Селиер, како што вели, не можел да ја пропушти можноста да работи со еден од најдобрите спортисти во светот, па картите останале неискористени. Закрепнувањето на Новак му станало приоритет на Французинот.
„Тоа е значајна авантура, која нема да ја заборавам. Работев со многу големи спортисти, олимписки шампиони, но не знаев дека постои човек со таква волја. Со Новак влегов во друга димензија. Тој има уникатна моќ и внатрешна сила. Толку е посебен Новак!
Откако беше опериран во Париз, многумина предвидуваа дека закрепнувањето на најдобриот српски спортист ќе трае долго, дека ќе мора да се фокусира на Олимписките игри, кои се играат на истото место како и Ролан Гарос. Тоа би значело да го пропушти Вимблдон. Сепак, на Новак му требаа само неколку дена за повторно да започне со тренинзи. Набрзо го зеде рекетот и на Вимблдон стигна до самата завршница. Тој го постигна овој успех по нешто повеќе од еден месец откако беше опериран во Париз.
Крај за хрватската сензација
Италијанската тенисерка Џасмин Паолини за првпат во кариерата се пласира во финалето на најстариот грен-слем турнир, Вимблдон, откако по три сета со 2:6, 6:4, 7:6 ја совлада 37. тенисерка во светот, Дона Векиќ од Хрватска.
Седмата тенисерка во светот победи по два часа и 51 минута и вторпат во кариерата се пласира во финале на грен-слем турнир. Во финалето на Вимблдон, Италијанката ќе ги одмери силите со Чехинката Барбара Крејчикова, која беше поуспешна од Елена Рибакина од Казахстан во полуфиналето, со 3:6, 6:3, 6:4.
