Американската актерка Мерил Стрип изјави дека „верверицата има повеќе права“ од девојчињата од Авганистан, придружувајќи се на повикот на авганистанските жени да се стави крај на строгите ограничувања на талибанската влада за начинот на живот на жените во Авганистан.
По повлекувањето на странските сили предводени од Американците и враќањето на власт во Авганистан во август 2021 година, новите талибански власти применија исклучително строго толкување на исламскиот закон.
Жените и девојчињата го носеа најголемиот дел од овие ограничувања: им беше забранет влез во јавни паркови, универзитети, дури и да пеат во јавност, што Обединетите нации го нарекоа „родов апартхејд“.
„Денес во Авганистан дури и верверица има повеќе права од авганистанско девојче бидејќи Талибанците ги затворија јавните паркови за жени и девојки“, рече Стрип за време на дискусијата на маргините на Генералното собрание на ОН во Њујорк.
„Во Кабул птицата може да пее, но девојката не може, а жената не може да пее јавно“, изјави познатата оскаровка. „Верувам дека меѓународната заедница како целина, доколку се соедини, може да влијае на промените во Авганистан и да го запре постепеното задушување на половина од населението“, додаде Мерил Стрип.
Талибанската влада, која допрва треба да биде признаена од која било друга земја во светот, објави жестоко глобално критикуван закон во август кој дополнително ги заостри ограничувањата на животот на жените во Авганистан.
Иако бројни мерки се неформално спроведени откако Талибанците ја презедоа власта во 2021 година, нивната официјална регулатива наиде на осуда од меѓународната заедница и групите за човекови права.
Законот за „порокот и доблеста“ диктира дека женскиот глас не смее да се крева надвор од домот и дека жените не смеат да пеат или читаат поезија на глас.
Од нив се бара и да го покриваат целото тело и лице кога излегуваат од домовите, а излегуваат само „во случај на потреба“.
Асила Вардак, лидерка на Форумот на жени за Авганистан, за време на дискусијата во ОН рече дека авганистанските жени се присутни во таа институција за да ги потсетат светските лидери дека „не се работи само за авганистанската борба“, туку и за „глобалната борба против екстремизмот “.
Фазија Куфи, поранешна пратеничка во Кабул, смета дека говорот за состојбата на Авганистанките во Генералното собрание е „мал знак на надеж“ за нив. „Но, тоа не е доволно“, додаде таа, повикувајќи на назначување на специјален претставник на ОН задолжен да врши притисок врз владата на Талибанците.
Генералниот секретар на ОН Антонио Гутереш изјави дека дискриминацијата на жените предизвикува голема штета на Авганистан. „Учеството на жените во раководството на земјата е докажано дека има корист за мирот, безбедноста, социјалната заштита, стабилноста на животната средина и многу други работи, бидејќи Авганистан се соочува со сериозни проблеми во сите овие области“, рече тој.
