Општина Бутел денеска побара од МВР да забрани движење на тешки товарни возила по мостот во Визбегово. Забраната ќе трае сè додека не се утврди во чија надлежност е надвозникот и кој треба да го поправи, бидејќи е нестабилен и бидејќи висат парчиња бетон од него, кои се опасност за луѓето и за возилата што поминуваат по магистралниот пат кон Косово.
– Направиме увид во состојбата на надвозникот. Спорна е надлежноста, бидејќи тој е над магистрален пат, за кој би требало да биде одговорно Јавното претпријатие за државни патишта. Како второ, неофицијално дознаваме дека во 2011 година, тој му бил доделен на Град Скопје, а постои и студија и се предвидува булеварско решение овде, од клучката кај Момин Поток со автопатско решение до границата – објаснуваат од Општина Бутел.
Проблемот со надвозникот во Визбегово се актуализираше пред еден месец од директорот на Центарот за управување со кризи, Стојанче Ангелов. Тој направи увид на конструкцијата и рече дека може да се урне во секој момент. Ангелов потенцира дека стручни лица му укажале за потенцијалната опасност, бидејќи токму по овој надвозник секојдневно поминуваат десетици градежни камиони. И жителите на Визбегово реагираат дека надвозникот не е сигурен ниту за возачите ниту за пешаците.
Од ЦУК неколку пати побарале од „Македонија пат“ и од Општина Бутел да интервенираат за решавање на проблемот.
(А.П.)
