Авионски лет беше одложен на аеродромот во Манчестер откако маж „погрешно“ се качил во авионот, соопшти денеска нискобуџетната авиокомпанија „Изи Џет“. Би-би-си дознава дека патникот од аеродромот требало да земе уште еден лет на „Изи Џет“, но по грешка се качил на летот за Милано. Инцидентот се случил во петокот вечерта.
Сите патници морале да се симнат од леталото бидејќи биле извршени дополнителни безбедносни проверки во согласност со стандардната процедура. Полицијата соопшти дека „мажот се качил на летот без соодветна документација“ и е уапсен.
Ништо сомнително не е пронајдено во авионот и ништо не сугерира дека инцидентот е поврзан со тероризам, соопшти полицијата. Портпаролот на „Изи Џет“ изјави дека летот е „предмет на дополнителни безбедносни проверки, во согласност со процедурите, поради патник кој неправилно се качил на летот“.
„Безбедноста и заштитата се наш највисок приоритет и затоа работиме со нашите партнери на аеродромот во Манчестер за да разбереме како успеал да се качи на летот“, додаваат тие.
Портпаролот на полицијата синоќа изјави дека маж на околу 20-годишна возраст е уапсен под сомнение дека „намерно се криел во авион без дозвола“. Портпаролот на „Изи Џет“ рече дека тие „не можат да откријат детали додека истрагата е во тек“.
