Шпанскиот тенисер Рафаел Надал имаше емотивен говор по елиминацијата на Шпанија во четврт-финалето на Дејвис купот. Тој се заблагодари за огромната поддршка и на репрезентацијата за шансата да игра во Малага.
– Морам да им се заблагодарам на сите. Тешко е да се почне, благодарност до навивачите. Ова беше дваесетгодишна кариера во која секогаш ме водевте. Ми помагавте да го освојам секој следен поен, во добрите времиња. А, во лошите – да продолжам да се борам. Сакам да ѝ честитам на Холандија за победата и да му се заблагодарам на целиот шпански тим што ми дозволи да играм во Дејвис купот. Не излезе како што сакавме, дадов сè што имав и од срце сум благодарен за шансата овие неколку дена повторно да се чувствувам како професионалец. Реалноста е дека никогаш не сакав да дојде до овој момент. Не сум уморен од тенисот, но телото едноставно дојде до точка во која повеќе не сака да игра – кажа Шпанецот.
Тој се осврна на резултатите и на својот тениски пат.
– Титулите, бројките се тука, луѓето го знаат тоа, ама јас сакам да ме паметат како добар човек од мал град во Мајорка што имаше среќа да има чичко кој е тениски тренер. Јас бев момче што си ги следеше соништата и правеше сè за да биде тоа што е денес. Има луѓе што се обидувале, а јас имав среќа затоа што животот ми даде шанса да доживеам неверојатни моменти благодарение на тенисот. Постигнав повеќе од она за што можев да сонувам – заврши шпанскиот тенисер.
Во својата кариера, Надал има освоено 22. грен- слем титули и дури четири пати се закити со пехарот во Дејвис купот, во 2004, 2009, 2011 и во 2019 година.
