Глобалниот недостиг на полупроводници можеби нема целосно да исчезне следната година и може да потрае до 2023 година за да се реши, изјавија директори на големи автомобилски компании за време на автосалонот ИАА во Минхен.
Зголемената побарувачка за полупроводници значи дека автомобилската индустрија би можела да се бори да обезбеди доволно од нив во текот на следната година, па и до 2023 година, иако недостигот би требало да биде помал дотогаш, рече извршниот директор на Daimler, Ола Калениус.
„Неколку добавувачи на чипови се повикуваат на структурните проблеми со побарувачката“, рече Калениус. „Ова може да влијае на 2022 година и [ситуацијата] може да биде порелаксирана во 2023 година“.
Извршниот директор на БМВ, Оливер Зипсе, рече дека очекува синџирите на снабдување да останат „затегнати“ во 2022 година. „Очекувам дека општата затегнатост на синџирите на снабдување ќе продолжи во следните шест до 12 месеци“, рече тој.
Зипсе рече дека не гледа проблеми долгорочно, додавајќи дека автомобилската индустрија е атрактивен клиент за производителите на чипови.
Извршниот директор на групацијата Фолксваген, Херберт Дис, рече дека недостатоците ќе продолжат и во следните месеци, па дури и години, бидејќи за полупроводниците има голема побарувачка.
„Интернетот на нештата расте и за засилувањето на капацитетот ќе биде потребно време. Веројатно ќе биде тесно грло во следните месеци и години “, рече тој.
Шефот за набавки на VW Мурат Аксел рече дека понудата на полупроводници останува многу нестабилна и со потешкотии во третиот квартал. „Се надеваме на постепено закрепнување до крајот на годината“, рече тој.
На автомобилската индустрија во светот ќе и требаат приближно 10 проценти поголем производствен капацитет за чипови, рече Аксел.
Извршниот директор на Рено, Лука де Мео, рече дека ситуацијата во врска со недостигот е потешка отколку што се очекуваше во текот на тековниот квартал.
Тој рече дека следниот квартал треба да донесе одредено подобрување и покрај слабата видливост.
Рено се држи до својата претходна прогноза за намалување на производството на 200.000 автомобили во 2021 година поради недостигот, рече Де Мео.
Производителите на автомобили, принудени од пандемијата со КОВИД-19 да ги затворат фабриките минатата година, се соочуваат со силна конкуренција од електрониката за широка потрошувачка при испораките на чипови, кои беа надополнети со серија прекини во синџирот на снабдување.
Автомобилите стануваат се повеќе зависни од чиповите – за се, од компјутерско управување со моторите за подобра потрошувачка на гориво до напредни карактеристики за помош на возачот, како што е итно сопирање.
„Дајмлер“ неодамна ја намали годишната прогноза за продажба на одделот за автомобили, проектирајќи дека испораките ќе бидат приближно во согласност со 2020 година, отколку значително да се зголемат.
Марката Мерцедес-Бенц на Дајмлер беше погодена овој квартал од исклучување на фабриките во Малезија, што во последниве години се појави како главен центар за тестирање и пакување чипови.
Infineon Technologies, NXP Semiconductors и STMicroelectronics се меѓу клучните добавувачи кои работат со фабриките во земјата.
Калениус рече дека Дајмлер се надева дека сопствената понуда на полупроводници ќе се подобри во четвртиот квартал.
