Се намалува бројот на компании кои даваат поштенски услуги. Во последните три години вкупно 22 правни субјекти го изгубиле статусот на даватели на поштенски услуги. Од нив, два обезбедувале поштенски услуги над 10 години, еден обезбедувал 9 години, четири имале просечен век на поштенско економска активност од 5 до 7 години, девет имале просечен век на поштенско економска активност од 2 до 4 години, а со најмал просечен век од 1 до 1,5 години на поштенско економска активност биле 6 даватели.
Од Агенцијата за пошти велат дека тоа се должи на намалената економска активност на стопанството како резултат на постковид и војната во Украина и порастот на цените и енергетската криза, како и на конкуренцијата, поради тоа што станале нерентабилни и не можеле да го одржуваат квалитетот на услугите и со тоа да ги задржат клиентите.
Кај приходите за првото полугодие на 2022 година кај даватели на поштенски услуги на слободниот пазар има зголемување од 9,5 проценти, а целиот поштенски сектор има зголемување на приходите од 0,5 проценти.
– Во 2022 година се издадени вкупно пет општи овластувања, од кои само три се за нови старт-ап компании, другите за проширување на мрежата и услугите. Но и интересот за влез е драстично намален годинава, имаме само две отфрлени нотификации поради откажување на подносителите во текот на постапката. Во 2020 и 2021 година вкупно 12 го изгубиле статусот на даватели и се избришани од регистарот, односно по шест годишно, додека во 2022 година 10 даватели го изгубиле статусот и се избришани од регистарот на лиценци – рече директорката на Агенцијата за пошти, Билјана Аврамовска-Ѓоревска.
Зошто поштенскиот пазар оди во надолна линија? Од Агенцијата за пошти посочуваат дека несоодветната достава на пратки, начинот на вршење на доставата на нотарски платен налог, оштетување на пратки и неисплатена откупнина, се најчестите причини за претставките до Агенцијата за пошти, а чиј број годинава изнесувал 29, а примени се и два управни приговори од корисници на поштенски услуги.
– Податоците од оваа година укажуваат на тоа дека корисниците за одредени проблеми со доставата успеваат да пронајдат заедничко решение со давателите и не поднесуваат претставки до Агенцијата за пошти. Овој напредок се должи пред сè на зголемената транспарентност и во зголеменото ниво на информираност на корисниците на услугите за рекламациските постапки – наведе Аврамовска-Ѓореска.
(С.Бл.)
