Најмалку две лица загинаа денеска во тропската бура Берил во југоисточниот дел на американската сојузна држава Тексас, а 2,5 милиони потрошувачи останаа без струја, соопштија локалните власти.
Еден постар маж и една 74-годишна жена загинаа во два одвоени инциденти кога дрвја паднаа врз нивните домови во областа Хјустон, соопштија претставници на округот Харис.
Авиокомпаниите откажаа повеќе од 1.300 летови поради невремето, а властите наредија мал број евакуации во крајбрежните градови.
Берил ослабе од јачина на урагани до тропска бура кога го погоди брегот на Тексас, придружен со силен дожд, пред да се движи кон градот Хјустон во таа држава, соопшти американскиот национален центар за урагани, пренесе Ројтерс.
Од Центарот велат дека Берил ќе продолжи да слабее додека се движи по копно.
Ураганот Берил ги погоди Карибите минатата недела, при што загинаа најмалку 10 луѓе.
