Највисокиот суд во американската држава Џорџија ја врати забраната за речиси сите абортуси по околу шест недели од бременоста.
Врховниот суд на Џорџија нареди забраната да стапи на сила во 17 часот по локално време, а организацијата „SisterSong“ со седиште во Атланта поднесе тужба со која се оспорува забраната, пренесува Хина.
„Денес, Врховниот суд на Џорџија застана на страната на екстремистите против абортусот“, рече извршната директорка на SisterSong, Моника Симпсон. „Секоја минута кога стапуваше во сила оваа штетна забрана за абортус по шестата недела, народот на Џорџија страдаше“, додаде таа.
Канцеларијата на Брајан Кемп, гувернерот на Џорџија, не одговори веднаш на барањето на Ројтерс.
Судијата на Врховниот суд на округот Фултон, Роберт МекБурни, го блокираше законот на 30 септември, тврдејќи дека тој го нарушува правото на приватност и слобода загарантирани со државниот устав.
Законот ги забранува речиси сите абортуси откако ќе се открие „чукање на срцето“, обично околу шестата недела, пред многу жени да сфатат дека се бремени. Законот беше усвоен во 2019 година, но не стапи на сила се додека Врховниот суд на САД во 2022 година не го поништи долгогодишниот преседан на Роу против Вејд, кој ги гарантираше правата за абортус на национално ниво.
