Досегашната министерка за правда Рената Дескоска, која се враќа на својата професорска работа, денеска му ја предаде функцијата на новиот министер Бојан Маричиќ.
-Денес извршивме примипредавање на функцијата министер за правда со новиот министер Бојан Маричиќ. На Бојан Маричиќ му го честитам изборот и му посакувам успех во вршењето на функцијата. Се надевам и очекувам во неговиот мандат, со забрзано темпо, нашето законодавство да се хармонизира со европското, а што е уште поважно, праксата да ни стане европска!, напиша Дескоска на фејсбук.
Маричиќ најави крупни реформски потфати во првите сто дена од својот мандат за ефикасно и објективно прочистување и деполитизација на судството и обвинителството.
Тој најави и ЕУ мониторинг на судските предмети на висока корупција како гаранција за фер и непристрасно судење и ефикасен судски процес, како и законски обврски со кои Јавното обвинителство ќе биде должно редовно, континуирано и јавно да информира за напредокот по предметите кои ги следат граѓаните.
Маричиќ вети и финансиската поддршка за зголемување на бројот на стручни соработници за секој судија и јавен обвинител и ефикасна и ефективна судска и јавно-обвинителска администрација, намалување на судската такса, како и надоградба на АКМИС системот каде што комуникацијата со сите странки ќе се одвива и електронски со што ќе се олесни пристапот до судската власт.
