Македонскиот триатлон тим направи голем успех на Балканското првенство во триатлон за кадети кое изминатиов викендов се одржа во Изворани, Романија.
Јосиф Малински (15) го освои прво место во балканска конкуренција и второ во апсолутна, а Марио Брезовски (14) беше втор во балканска конкуренција и трет во апсолутна. И двајцата се членови на скопскиот ТК „Триоги рејсинг“.
-Ова е голем успех за нашите триатлонци. Работиме напорно, се трудиме да го донесеме триатлонот рамо до рамо барем со балканските земји, гледајќи перспективно и подалеку. Патот не е едноставен, ресурсите се многу ограничени, но ентузијазмот е тој што не држи на оваа патека. Имаме генерации младинци што можат многу да постигнат, ние, а и државата треба да им помогнеме да го остварат тоа – вели Данчо Ѓорѓијевски, селектор на триатлон репрезентацијата и основач на клубот „Триоги рејсинг“.
Македонската репрезентација на Балканското првенство успешно ја претставија и: Бобан Јаневски, Филип Здравев, Варвара Атанасовска (Триоги рејсинг – Скопје) Матео Мачоски и Тија Кукунешоска (3Дисциплинес од Струга) и Стефан Делев (ТК „Софка“).
