Венецуелскиот претседател Николас Мадуро, кој го освои трет мандат според официјалните резултати на изборите на 28 јули, изјави дека околу 2.000 луѓе биле уапсени за учество во протестите на опозицијата, која тврди дека изборите биле украдени.
Мадуро во саботата во обраќањето пред приврзаниците во Каркас рече дека уапсените ќе се соочат со максимална казна, објави Гардијан.
Според различни извештаи, меѓу 10 и 20 лица загинале во судирите со полицијата на протестите по изборите.
Во исто време, лидерот на венецуелската опозиција Марија Корина Мачадо се обрати на масовниот митинг на десетици илјади луѓе во главниот град Каракас, во саботата, пркосејќи на владините повици за нејзино апсење и изјавувајќи дека владејачкиот режим изгубил секаква легитимност.
Таа оцени дека опозицијата никогаш не била посилна, и дека режимот никогаш не бил послаб и дека опозицијата нема да се откаже од докажувањето дека изборите се украдени, пренесе Би-би-си.
Мачадо избегна јавни настапи претходно оваа недела откако го обвини претседателот Николас Мадуро за изборна измама и победата на опозицискиот кандидат Едмундо Гонзалес.
Мадуро, пак, најави „максимални казни“ за антивладините демонстранти кои велат дека неговиот реизбор бил наместен.
Националната изборна комисија објави дека Мадуро победил на изборите со 52 отсто од гласовите, без да објави целосен преглед на резултатите од поединечните избирачки места.
Опозицијата рече дека според пребројувањето на гласовите, Гонзалес го победил Мадуро со голема разлика.
Победата на Гонзалес на изборите ја признаа, меѓу другите, САД, Аргентина, Уругвај и Перу, додека Кина и Русија го поддржаа Мадуро.
