Американскиот секретар за одбрана, Лојд Остин, го поништи договорот за признавање вина, постигнат претходно оваа недела за обвинетиот организатор на нападите од 11 септември 2001 година и уште двајца други обвинети, што значи дека сè уште може да се соочат со смртна казна.
Потегот доаѓа два дена откако воената комисија во заливот Гвантанамо, Куба, објави дека функционерот назначен да го надгледува судењето, пензионираниот генерал Сузан Ескалиер, одобрил договор за признавање вина со Калид Шеик Мохамед и двајцата обвинети соучесници, Валид бин Аташ и Мустафа ал- Хавави, пренесува АП.
Во писмата испратени до семејствата на речиси 3.000 лица убиени во нападите на милитантната исламистичка група Ал Каеда, се вели дека договорот ќе предвиди тројцата да одлежат доживотен затвор во замена за признанијата за вината.
Остин рече дека го откажал договорот што би им овозможил на обвинетите да избегнат смртна казна.
Републиканците побрзаа да ја обвинат администрацијата на претседателот Џо Бајден за договорот, иако Белата куќа соопшти дека не знаела за тоа.
Републиканскиот сенатор Том Котон од Арканзас, член на Комитетот за вооружени служби, претходно во петокот го осуди договорот, нарекувајќи го „срамен“.
Обвинетите се обвинети за киднапирање и уривање на патнички авиони во Светскиот трговски центар, Пентагон и поле во Шенксвил, Пенсилванија, на 11 септември 2001 година.
