Избирачките места на локалните избори во Турција, на кои повеќе од 61 милион гласачи избраа кандидати од 34 политички партии, беа затворени во 17 часот.
Гласањето помина со насилство, при што загинаа три лица, а неколку беа повредени. Првите резултати од гласањето се очекуваат во раните вечерни часови, објави Ројтерс.
Едно лице загина, а 11 се повредени во судир со оружје, палки и камења на југоистокот од земјава.
Во друг инцидент, во тепачката едно лице загина, а четворица се ранети, јави Анадолија.
Судири имаше и во Шанлиурфа, каде беа повредени 16 лица, додека едно лице беше избодено со нож во Афјонкарахисар на западот на земјата.
Демирорен извести дека во текот на ноќта во Бурса едно лице е убиено, а двајца се ранети.
Турските граѓани денеска избраа градоначалници, началници на области и други локални функционери кои ќе ја извршуваат функцијата во следните пет години, вклучително и лидери во Истанбул, Анкара и Измир, објави турската државна телевизија ТРТ.
Ројтерс објави дека турскиот претседател Реџеп Таип Ердоган се обидува да ја врати контролата врз Истанбул од неговиот главен ривал Екрем Имамоглу и дополнително да ја консолидира својата политичка позиција.
