Новиот предводник на каталонскиот гигант Барселона, Роналд Куман, одржа прес-конференција пред првенствената пресметка против екипата на Вилјареал која заврши со триумф на „сино-црвените“ од 4:0. Веќе на првата официјална прес-конференција, искусниот холандски стручњак мораше да „голта кнедли“ поради заминувањето на уругвајскиот интернационалец, Луис Суарез.
Шпанските медиуми се убедени дека управата и тренерот се најголемите виновници за заминувањето на искусниот напаѓач, но Куман реши да се брани од сите тие напади.
- Сите добија впечаток дека јас испаднав лошата личност во овој филм иако јас го повикав Суарез и покажав почит кон него како фудбалер и како личност. Му кажав дека ќе му биде тешко во борбата за што е можно поголема минутажа, но му кажав и дека ќе биде дел од тимот доколку реши да остане на „Ноу Камп“. Пред да потпишам договор со Барселона, клубот веќе имаше донесено неколку важни одлуки кои морав да ги прифатам, изјави Куман.
Само што си замина од редовите на Барса, на инстаграм од него се збогува и големиот пријател Лионел Меси кој повторно јавно ги нападна клупските челници поради клупската политика.
- Нормално е играчот да биде тажен кога некој пријател ќе го напушти клубот.Но, ова е дел од фудбалот. За мене најважно е што прави Меси на тренинзите и натпреварите. Досега, тој секогаш беше пример за време на тренинзите. На вчерашниот и денешниот тренинг тој покажа дека го надминал сето ова. Не се сомневам во него, додаде Куман..
Поранешниот селектор на Холандија потврди дека Барса планира да ангажира нов напаѓач, а во игра за таа позиција се Лаутаро Мартинез од Интер и Мемфис Депај од Лион.
- Клубот мора да биде подготвен во секое време да го засили тимот. Ние бараме начини да се подобриме. Но, веројатно, она што го сакам како тренер е невозможно во однос на финансиската состојба на клубот. Важно е да зборуваме за она што го имаме. Дури и да не добиеме нов централен напаѓач, на располагање ги имаме Ансу Фати и Осман Дембеле, објасни Куман.
На крајот од прес-конференцијата, Куман потврди дека Барселона ќе игра во нова шема во споредба со претходните сезони – 4-2-3-1.
- Очигледно, треба да бидеме постабилни во одбраната. Во принцип, ја менуваме шемата и ќе притиснеме повисоко. Ова се радикални акции и ќе ни треба време, заврши Куман.
