Израелскиот премиер Бенјамин Нетанјаху им наредил на своите соработници да ги информираат семејствата на заложниците дека лидерот на Хамас Јахја Синвар е мртов, јавува израелскиот Канал 12.
Здружението на семејства на заложници претходно денеска ја повика израелската влада да го искористи веројатното убиство на Синвар за да обезбеди итен договор за заложниците.
„Тајмс оф Израел“ цитираше неименуван израелски функционер дека Синвар бил убиен во напад на зграда во Рафах, во јужниот дел на Појасот Газа.
Во исто време, Хамас предупреди на „лажни вести“, наведувајќи дека официјалните изјави на оваа милитантна група се објавуваат само на каналот или веб-страницата Телеграм.
Израел ја истражува можноста палестинскиот лидер на Хамас Јахја Синвар да е убиен во напад на израелската армија во Газа, а неименуван висок израелски функционер вели дека е голема веројатноста тој да е убиен.
Се утврдува идентитетот на лицето кое беше меѓу тројцата убиени палестински членови на Хамас за време на една од последните операции на ИД во Појасот Газа.
Израелската телевизија Кан потсетува дека Израел има примерок од ДНК на Синвар, бидејќи тој претходно бил во израелски затвор.
Телото на убиениот е во сопственост на израелската армија и ДНК тестот ќе овозможи со стопроцентна сигурност да се утврди дали лидерот на Хамас е елиминиран.
Синвар беше назначен на почетокот на август за политички лидер на таа милитантна палестинска група, по атентатот на нејзиниот водач Исмаил Ханије во Техеран.
Синвар (61) стои зад нападот врз Израел на 7 октомври минатата година, бидејќи израелската армија го бараше во енклавата.
Тој помина 23 години во израелските затвори пред да биде ослободен во 2011 година како дел од размена на затвореници, пренесува Танјуг.
