Центарот за научно истражување и промоција на културата „Хаемус“ денеска напладне во ТЦ „Капитол“ седми пат ќе ја организира манифестацијата „Среќна Баба Марта 2020“, која е дел од активностите за признавање на мартинките за нематеријално светско културно наследство впишано на Репрезентативната листа на УНЕСКО.
Настанот ќе биде отворен до 1 март и покрај изложба на оригинални рачно изработени амајлии од нашата земја, Бугарија и Романија, ќе опфати и едукативни панели, продажна галерија со ракотворби и креативна работилницa за деца.
„Статусот кој УНЕСКО му го додели на ‘Хаемус’ како носител на обичајот мартинки, кој е светско културно наследство впишано на Репрезентативната листа на УНЕСКО, е огромна одговорност за нас како граѓанска организација. За таа намена беше креиран долгогодишниот проект ‘Денот на Баба Марта’ преку кој покажуваме дека ги почитуваме верувањата и обичаите поврзани со мартинките и ги негуваме во духот на традицијата, во сите облици и начини кои би придонеле за нивната поширока промоција, едукација и популаризација“, изјави Василка Димитровска, директор на „Хаемус“.
(Извор: МИА)
