Откако Високиот суд во Зајечар го потврди обвинението за убиството на Данка Илиќ, бранителите на Дејан Драгијевиќ и Срѓан Јанковиќ, кои се товарат за тешко убиство, и на таткото на Дејан, Радослав Драгијевиќ, кој е обвинет за помагање на сторителите на кривичното дело,најавија дека во следните три дена ќе поднесат жалби до Апелациониот суд во Ниш, за да се укине решението и да се донесе ново решение.
Бранителот на Радослав Драгијевиќ, обвинет за непријавување кривично дело и помагање на сторителот, најави навремена жалба, бидејќи, како што вели, смета дека обвинителниот акт е незаконски покренат против неговиот клиент и очекува Судот на Апелација да ја укине таквата одлука, па дури и да ја прекине кривичната постапка. Милинко Јовановиќ, бранителот на Радослав Драгијевиќ изјави дека Радослав е татко на Дејан, кој во истиот случај беше обвинет за кривично дело – тешко убиство и дека тој како најблизок роднина не може да одговара со закон за не пријавување на тоа кривично дело.
-Тоа го ослободува и од одговорност за второто кривично дело за кое беше обвинет, а тоа е помагање на сторителот по извршувањето на кривичното дело. За тие две кривични дела според законот не одговараат најблиските, рече адвокатот Јовановиќ.
Познавачите велат дека доколку жалбата на бранителот биде одбиена и судот не ја прекине постапката, што е малку веројатно во оваа фаза, може да очекуваме главниот претрес да почне за половина година до една година.
Адвокатот Предраг Савиќ рече дека обвинителството има многу тешка задача да докаже и да го убеди судот во извесноста на нивните докази.
-Доказите се релевантни, дека има меѓусебна поврзаност меѓу тие докази и кривичното дело убиство на малата Данка, нема тело, нема ДНК и се бара доживотна казна затвор, рече Савиќ.
Игор Јуриќ од Центарот за исчезнати и малтретирани деца рече дека верува оти судската постапка ќе биде покрената, но каков ќе биде епилогот од судењето ќе биде голема дилема.
-Имаме двајца мажи кои сториле тешко кривично дело, доколку нема други материјални докази и немаме директен сведок за ова кривично дело, јас лично мислам дека ќе биде многу тешко да се дојде до пресуда, рече Јуриќ.
Родителите на Данка Илиќ велат дека очекувале претходно да биде потврдено обвинението и дека се надеваат дека на судењето ќе ја дознаат вистината каде е телото на нивната ќерка, а Драгијевиќ и Јанковиќ заслужуваат да останат во затвор. Сепак, како што додаваат осудата нема да ја врати нивната ќерка.
-Моето дете го нема, дури ни нејзиното тело. Секој ден се повеќе се борам со болката. Никој не може ни да замисли колку е тешко, изјави мајката Ивана Илиќ за Телеграф.
Таткото Милош Илиќ рече дека би сакал само да знае каде е телото на неговата ќерка, за тој и Ивана да ја закопаат или барем да најдат мир, што е можно повеќе.
-Слушнав дека обвинението е потврдено, тоа го очекував и време е тоа да се случи, што поскоро да заврши оваа агонија и тие да ја добијат заслужената казна, рече тој.
Поминаа осум месеци од исчезнувањето на двегодишната Данка Илиќ, но многу работи во овој случај се уште се мистерија. И покрај обвинението дека девојчето било убиено, нејзиното тело никогаш не е пронајдено и таа официјално не е прогласена за мртва.
