Невладината организација „Пурпура“ од Тетово и нивниот центар за аутизам „Летај за живот“ периодов спроведуваат неколку активности во рамки на проектот „Уметноста, јазикот со кој зборуваме сите“. Станува збор за работни активности на вработените психолози и настани за децата со аутизам посетители во центарот.
– Главна активност од проектот беше изложба на 15 слики во Центарот за култура со тема Спектарот на аутизмот, создадени од уметникот Невзат Бејтули-Кица. Доминираа сината боја и сложувалките кои се симбол на децата со аутизам. Дел од проектот беа дуо-концертот на Шклезен Пајазити и Шклезен Бафтијари, стенд-ап комедија на актерот Хашим Мемиши. Од работните активности дел од проектот беше регионална средба на здруженија и родители на деца со аутизам од повеќе земји во Тетово, информираат од Центарот за аутизам.
Оттаму најавуваат дека во наредниот период ќе бидат организирани и две театарски претстави во Центарот за култура.
Овој центар почна со работа во јуни 2019 година, каде со децата со аутизам работат обучени терапевти-психолози.
Извор:МИА
