Десетици илјади жени ширум Исланд, вклучително и премиерката Катрин Јакобсдотир, се очекува утре да престанат со работа во првиот штрајк од ваков вид по речиси половина век. Организаторите се надеваат дека штрајкот на жените ќе го доведе општеството во мртва точка за да го привлече вниманието на тековниот родов јаз во платите и раширеното родово и сексуално насилство во земјата.
Настанот ќе го одбележи првиот целодневен штрајк на жените од 1975 година, кога 90 отсто од жените од Исланд одбија да работат, што доведе до клучни промени, вклучително и првата жена избрана за претседателка на земјата. Но, организаторите на последниот штрајк, од кои некои учествуваа во штрајкот во 1975 година, велат дека фундаменталното барање да се цени трудот на жените не е исполнето 48 години подоцна.
И покрај тоа што се сметаат за глобален лидер во родовата еднаквост, жените од Исланд сè уште заработуваат до 20 проценти помалку од мажите во некои професии, а повеќе од 40 проценти од жените доживеале родово или сексуално насилство.
Организаторите на штрајкот, исто така, велат дека работните места кои традиционално се поврзуваат со жените, како што се чистењето и негата, сè уште се потценети и недоволно платени.
„Тие зборуваат за нас, зборуваат за Исланд, како да е рај на еднаквоста“, рече Фреја Штајнримсдотир, еден од организаторите на штрајкот и директор за комуникации на БСРБ, Исландската федерација на јавни работници.
„Но, рајот на еднаквоста не треба да има разлика во платите. Тоа не е она за што жените ширум светот се стремат“, заклучува Штајнримсдотир.
