Центарот за истражување и информирање за животната средина „Еко-свест“-Скопје информира дека најновите истражувaња од експерти во соработка Центарот покажуваат дека воспоставувањето на централно греење зависно од ТЕЦ Битола не е нај исплатливото и најефикасно решение за граѓаните.
Според студија што ги истражува алтернативите за индивидуално и централно греење за Битолскиот регион, се препорачува поврзување на фотоволтаични системи со инвертер клима уреди за индивидуални куќи и колективни згради кои ќе овозможат поголеми заштеди на енергија и намалени трошоци за граѓаните. Системот за централно греење кој е зависен од ТЕЦ Битола е повеќедецениски проект кој сè уште не е спроведен заради несоодветно планирање и затоа анализите од студијата на Еко-свест и мрежата CEE Bankwatch Network сугерираат дека достапноста на нови технологии базирани на обновливи извори го прават овој проект скапа и неисплатлива инвестиција.
-За да ја забрзаме енергетската транзиција и декарбонизацијата, мора да почнеме да имплементираме одржливи практики за домаќинствата преку воспоставување на системи за индивидуално и централно греење базирани на чиста енергија. Ваквите системи веќе се практикуваат во земјите од Европа и стануваат се поатрактивни бидејќи во тоа е иднината доколку сакаме да се стремиме кон независност и одржливост на енергетскиот систем. Сончевиот потенцијал кај нас е огромен и неговото искористување за загревање на домаќинствата претставува важен елемент за декарбонизација на регионите зависни од јаглен, истакна Кристина Димитрова од Еко-свест.
Во соопштение за јавност, од ЕКО-свест велат дека постојат алтернативи од поновите генерации на системи за греење кои се базираат на чиста енергија, а првичните наоди на Вања Џинлев, асистент и истражувач за енергетика при Федералниот институт за технологија во Цирих, препорачуваат искористување на потенцијалите од сончевата енергија за индивидуално и колективно загревање на домаќинствата во Битола.
-Анализата на алтернативите на планираното централно греење во Битола базирано на искористување на капацитетите на РЕК Битола покажува дека постои технолошко-економска исплатливост за употреба на други технологии во домаќинствата што ќе ги задоволат потребите за топлинска енергија. Прелиминарната анализа покажа дека индивидуални инвертер системи во комбинација со фотоволтаични системи, имајќи го во предвид моменталното ограничување на капацитетите на производители-потрошувачии за физички и правни лица, е најсоодветната и најисплатливата опција за задоволување не само на топлинските потреби во домаќинствата, туку и на електричната енергија, нагласи Вања Џинлев, автор на истражувањето.
Од ЕКО-свест најавуваат дека на почетокот на ноември ќе биде објавена финалната студија со сите детали и можни сценарија за ваквата трансформација на системите за греење.
