Поради новите мерки за заштита од вирусот, туристичките агенции бележат откажување на аранжманите како и намален интерес за летување во септември иако вообичаено во тој период има голем интерес поради поволните цени. Најмногу откажување има за аранжманите во Црна Гора и Албанија, бидејќи таму можеше да се патува без тестови и сертификати, а сега за враќање во државата ќе мора да се исполнат пропишаните услови, што е дополнителен трошок за граѓаните.
За полесно надминување на состојбите и намалување на економските последици за граѓаните и за туристичкиот сектор од воведувањето на новите мерки Туристичко-угостителската комора инсистира да се создадат услови за тестирање на граничните премини како и можност на влез во државата да се зема решение за изолација која ќе може да биде укината во период од 24 часа со приложување на негативен тест за ковид.
-Во овој дел бараме изолацијата да може да биде прекината по приложен негативен тест. Тоа значи дека граѓаните на самите гранични премини да земат документ за самоизолација, а истата да може да биде прекината со приложување на негативен PCR тест или антиген тест уште во наредните 24 часа, истакна Ана Марија Алексова од ТУК.
Дополнително Алексова вели дека е потребно и да има можност во меѓуграничните зони да се прават тестови за ковид кои би биле по достапни цени, а да има и можност за влез во државата со негативен антиген тест кој може да се купи во аптека.
И Маја Димитровска од Атлас изјави дека веќе има откажувања на туристичките аранжмани од страна на граѓаните и оти мерката е задоцнета и требаше да биде донесена многу порано.
-Ако државата носи ваква мерка тогаш мора да обезбеди рапид тестови на граница, а друга опција е граѓаните да одат во самоизолација и во рок од 24 часа да достават негативен ПЦР тест, додава таа.
Дел од граѓаните кои деновиве заминаа на одмор во Грција велат дека поради зголемениот број на заразени со ковид-19 заострени се условите за влез во државата. Претходно на граница ги бараа само пасошите, а сега ги проверуваат сите документи, освен тоа сега туристите не се тестираат по случаен избор, туку се тестираат речиси сите дури и оние кои се вакцинирани.
Според информациите, ПЦР тестовите во Грција чинат околу 50 евра, а во Хрватска и до 100 евра. Така доколку некој од членовите на семејството не е вакциниран, тоа ќе претставува дополнителен трошок за македонските туристи.
На 17 август владата донесе одлука од први септември домашни и странски државјани за влез во државата да приложат сертификат за вакцинација со примени најмалку две дози или сертификат за прележан ковид-19 во последните 45 дена, сметајќи од денот на оздравувањето, како и негативен тест направен 72 часа пред влез во земјата. За македонските државјани кои ќе се враќаат во земјата по први септември, а немаат ПЦР тест, или потврди за примена вакцина или за прележан ковид-19, ќе се одреди мерка карантин од седум дена домашна изолација со решение од Државниот санитарен и здравствен инспекторат.
(А.С.)
