Редовно се спроведува вакцинацијата против беснило кај домашните миленици во Куманово и во соседните општини. Формирани се екипи кои ги вакцинираат кучињата по однапред определени реони во градот, приградските населби и селата во Кумановско. Сопствениците се веќе информирани и дел од нив сами ги носат домашните миленици во центарот за вакцинација.
– Вакцинацијата почна навреме во јануари и досега се спроведува тековно, по планот и програмата. Се вакцинираат домашните миленици кои се чипирани. Сопствениците чии миленици не се чипирани, ќе мора да платат и за чипирање. Работиме и во сабота. Препорачливо е сопствениците кои се вработени да ги донесат милениците, тој ден – изјави ветеринарниот лекар, Димитар Венев од ветеринарно-сточарскиот центар „Тодор Велков“ од Куманово.
Цената на вакцината против беснило, која вклучува и таблети против паразити, изнесува 590 денари. Вакцинацијата е редовна и се спроведува во периодот од јануари до мај.
