Во саботата, во кафулето „Френклин“ беше одржана промоција на вториот студиски албум на Ване, попознат во светот на музиката кака Стар Бој. Во присуство на семејството, најблиските соработници и на пријателите, тој го промовираше својот нов албум наречен „Евровизија“, кој е составен од дванаесет песни, од кои дел се во соработка со други артисти од Бугарија и од Македонија. Најави и песна со специјален артист од Македонија, кој живее во Италија. Откри дека со него има песна во која пее и на италијански и на македонски.
Како што напомена и самиот, името на овој албум доаѓа само од Европа, а на прашањето дали, можеби, има план во иднина да ја претставува Македонија на натпреварот за песна на Евровизија, одговори негативно.
– Сега-засега, не ми е тоа во план. Името на албумот “Евровизија“ е затоа што звукот доаѓа од Европа, како и животниот стил и сè останато – изјави Стар Бој.
Интересно за него е тоа што веќе 10 години живее во Париз, каде што работи како диџеј. Вели дека разликата во музиката меѓу Франција и Македонија е огромна.
– Има многу голема разлика меѓу музичката сцена во Македонија и во Франција. Пред сè, во бројот на артисти, потоа и во жанровите на музика што се креираат и целиот шоу-бизнис – појасни тој.
Сепак, и покрај сè, тој се надева дека ние, како земја, ќе се обидеме да се доближиме на музички план до европската сцена со тоа што ќе се прават квалитетна музика и добри проекти. Верува дека овој албум навистина ќе го доживее својот врв, бидејќи е нешто поразлично и, како што напомена, е негов животен стил.
– Не би се гледал себеси како најдобар рапер, можеби, сум добар рапер, талентиран, имам амбиција да бидам најдобар и ќе се потрудам да биде така со моите проекти – беа само дел од изјавите на Стар Бој пред публиката.
Меѓу другото, најави и нови проекти.
Стар Бој нема конкуренција, како што кажа, самиот на себе си е конкуренција и тоа е сосема доволно за него.
Познатиот водител и шоумен Давид Давидовски ја водеше промоцијата и имаше само пофални зборови за овој албум.
Инаку, Ване доаѓа од Велес, има 32 години и, покрај промоција на својот албум, го прослави и својот роденден. Тој е татко на две деца. (С.Б.)
