Моќниот тајфун Ман-џи денеска го погоди северниот дел на Филипините и уништи куќи, предизвика големи бранови и принуди стотици илјади луѓе да се евакуираат во привремени засолништа.
Според официјалните извештаи, тајфунот Ман-џи е шестиот поголем систем на бури што ги погодил Филипините во последниот месец, пренесува АП.
Тајфунот ја погоди провинцијата Катандуанес во источниот дел на Филипините во саботата навечер, со постојани ветрови до 195 километри на час и налети до 240 километри на час.
Филипинската метеоролошка агенција предупреди на „потенцијално катастрофална ситуација опасна по живот“ во провинциите на патот на тајфунот. Областа Манила веројатно ќе биде поштедена од директен удар, но заедно со околните региони е ставена под предупредување за бранови на бури и опасност од плимни бранови, пренесува Танјуг.
