Две лица загинаа, а две жени и еден маж се водат за исчезнати по дождот што денеска предизвика големи поплави во бугарскиот град Царево, во областа Бургас, соопшти бугарскиот премиер Николај Денков.
Тој рече дека количината на врнежи во последните 24 часа го надминала месечниот просек меѓу три и четири пати, пренесува агенцијата БТА, наведувајќи дека смртни случаи има и во соседна Турција.
Грција и Турција доживеаја слични поплави и пријавија смртни случаи. Луѓето покрај плажата и во камповите се евакуирани, изјави Денков на новинарите.
Снабдувањето со електрична енергија е во прекин, а водата не може да се користи за пиење.
Полицијата во регионалниот главен град Бургас соопшти дека линијата за итни случаи 112 примила бројни повици од луѓе во неволја и повеќе од 100 се евакуирани, изјави градоначалникот на Царево Георги Лапчев по состанокот на работната група за катастрофи.
Неколку противпожарни екипи се испратени од Бургас и Приморско да им се придружат на локалните противпожарни служби кои се справуваат со последиците од поплавите.
Во популарниот камп Арапија, надојдените води достигнаа висина од два метри, а неколку автомобили беа однесени во морето.
Националниот институт за метеорологија и хидрологија издаде жолто предупредување за силен ветер и грмотевици во 15 региони на Бугарија и портокалова тревога за силно невреме во областа Бургас.
Работната група за кризи ги предупреди жителите од областа да не ги напуштаат своите домови, а нареди и привремен прекин на сообраќајот во Царево и околните населени места.
Приодите кон Царево беа затворени за сообраќај, а прекинот во снабдувањето со електрична енергија траеше со часови, велат мештаните за агенцијата БТА.
