Поранешниот фудбалер Михаил Кавелашвили денеска во парламентот е избран за претседател на Грузија, со мнозинство гласови на комисијата, која е составена од 300 членови на парламентот и локалните власти, пренесе АП.
Кавелашвили (53) лесно ги освои гласовите со оглед на тоа што владејачката партија Грузиски сон го контролира изборниот колеџ со 300 места, кој ги замени директните претседателски избори во Грузија за прв пат од 2017 година, според американската агенција.
Грузискиот сон ја задржа контролата врз парламентот на земјата на изборите одржани на 26 октомври, за кои опозицијата тврди дека биле наместени со помош на Москва.
Грузискиот претседател во заминување Саломе Зурабишвили и главните прозападни партии оттогаш ги бојкотираа парламентарните седници и побараа повторување на гласањето.
Како што пренесува порталот Georgiatoday.ge, претседателката на Грузија во заминување, Саломе Зурабишвили, накратко се појавила во близина на парламентот за време на гласањето, кога во изјава за медиумите претседателските извори ги нарече „исмејување на демократијата“, пренесува Танјуг.
„Пред една година Грузија доби статус на кандидат (за членство во ЕУ), денес Централниот комитет, како и парламентот, избира еден и единствен кандидат во исмејување на демократијата. Тоа никогаш нема да ја спречи Грузија да го следи нејзиниот европски пат и демократска иднина“, рече Зурабишвили.
За време на гласањето за претседателските избори во парламентот, полициски сили беа мобилизирани во близина на зградата на парламентот, во ограден периметар, со водени топови поставени на Плоштадот Слобода, каде продолжија протестите како одговор на претседателските избори.
Демонстрантите ги изнесоа своите барања за распишување нови избори и ослободување на оние за кои тврдат дека се незаконски приведени.
