Претседателот на Европскиот совет, Шарл Мишел, во врска со медиумските наводи за утрешната посета на унгарскиот премиер Виктор Орбан, на Москва, рече дека ротирачкото претседателство со Советот на ЕУ нема мандат да соработува со Русија во име на Европската унија.
Шарл Мишел во објава на платформата Х изјави дека без учество на Украина не може да има дискусија за тоа.
– Европскиот совет е јасен: Русија е агресор, Украина е жртва. Без Украина не може да има дискусија за Украина – изјави Мишел.
Според висок дипломат на ЕУ, Орбан не информирал ниту една институција за неговото патување во Москва.
– Имаше многу обиди да се воспостави контакт и да се потврдат извештаите за евентуална посета на Орбан на Русија, но беа неуспешни – рече тој, додавајќи дека и да побарал Орбан, ќе бил „строго советуван против таква посета“.
На веста за можна посета на Орбан на Москва со неверување реагираше и полскиот премиер Доналд Туск.
– Гласините за твојата посета на Москва не можат да бидат повистинити, Орбан, или можат да бидат? – праша Туск на социјалната мрежа Х.
Унгарскиот сервис на Радио Слободна Европа, повикувајќи се на извор од унгарската влада, објави дека Орбан утре ќе отпатува за Москва на средба со рускиот претседател Владимир Путин.
Виктор Орбан патува за Москва, неколку дена откако во Киев се сретна со украинскиот претседател Володимир Зеленски.
Портпаролот на рускиот претседател Дмитриј Песков ниту ја потврди ниту ја демантираше можноста за посета на Орбан на Русија.
– Немам што да ти кажам. Претседателот утре има напорен распоред. Подоцна ќе ве информираме – рече Песков.
Според РСЕ, Орбан во Москва ќе биде придружуван од министерот за надворешни работи Петер Сијарто. Шијрото ја посети Русија повеќе од пет пати од почетокот на војната во Украина.
Минатиот месец Путин рече дека Русија ќе ја заврши војната само доколку Киев исполни одредени услови, вклучително и повлекување на Украина од амбициите на НАТО и отстапување на четири делумно окупирани региони на кои Русија целосно претендира, покрај Крим.
Украина ги отфрли тие услови како апсурдни и рече дека тие претставуваат капитулација.
