Украинските функционери со месеци велат дека нема да отстапат ни милиметар од територијата окупирана од Русија во ниту еден мировен договор, но враќањето на Доналд Трамп во Белата куќа и неговата најава за мировни преговори очигледно предизвикаа Киев да ја напушти својата „црвена линија“.
Имајќи предвид дека украинските сили сè помалку се способни да го контролираат фронтот на истокот на земјата, двајца високи функционери изјавија за Њујорк Тајмс дека одбраната на интересите на Украина во потенцијалните преговори повеќе нема да зависи од територијалните граници, туку од тоа какви гаранции постојат за прекин на огнот.
– Разговорите треба да се засноваат на гаранции. Ништо не е поважно за Украина – изјави Роман Костенко, претседател на Одборот за одбрана и разузнавање на украинскиот парламент.
Друг висок украински функционер беше уште подиректен, говорејќи под услов да остане анонимен за чувствителните преговори. – Територијалното прашање е исклучително важно, но тоа е друго прашање. Првото прашање се безбедносните гаранции – рече функционерот.
Украина ги третира своите граници врз основа на нејзината декларација за независност во 1991 година, иако Русија оттогаш презеде контрола над околу 20 отсто од украинската земја. Сепак, Киев нема официјално да се откаже од своите претензии за која било територија под руска окупација, рече Костенко.
Овој нов пристап што го презема Украина се чини дека всушност го оправдува секој можен договор со кој Русија би ја задржала контролата врз украинската земја. Киев бара членство во Организацијата на Северноатлантскиот договор како гаранција против обновените напади од Русија.
Западните власти сигнализираа дека сакаат Украина да се приклучи на НАТО, но не по забрзан распоред. Официјални лица во Киев, исто така, рекоа дека силниот арсенал на конвенционално оружје, обезбеден од Западот, ќе и овозможи на Украина брзо да возврати, што ќе послужи како пречка за обновени непријателства.
Безбедносните гаранции, а не територијалните, претставуваат најтешко прашање во секој мировен договор, пишува Њујорк Тајмс. Кога Украина и Русија одржаа мировни преговори во 2022 година, Русија заврши со напуштање на критичната компонента на предложениот договор: аранжман што ги обврзува другите земји да ја одбранат Украина доколку таа некогаш биде повторно нападната.
