На површина од 120 квадратни метри, во ОУ „Димитар Миладинов“ се отвора центар за талентирани ученици.
Станува збор за меѓуопштинска соработка меѓу Центар, Карпош и Кисела Вода. Центарот вклучува три посебни простории, опрема за планетариум и физика, биохемиска лабораторија и лабораторија за уметности, каде што ќе работат учениците заедно со своите наставници.
Просторот е со посебен влез, физички одвоен од влезот во училиштето.
Градоначалникот на Општина Центар, Горан Герасимовски, истакна дека оваа меѓуопштинска соработка може да биде корисна и перспективна за талентираните ученици од трите општини.
– Центарот за работа со талентирани ученици е идеја што подолго време ја чека својата реализација во Општина Центар. И навистина ме радува што оваа меѓуопштинска соработка, оваа активност, може да биде навистина корисна и перспективна за талентираните ученици од трите општини. Навистина ми е мило што Општина Центар и општините Карпош и Кисела Вода се водечки општини во формирањето ваков центар, односно катче за нашите талентирани ученици да го развиваат и да го надградуваат својот талент. Верувам дека овде учениците ќе поминуваат убаво и квалитетно време, ќе се градат и ќе се развиваат и достојно ќе ги претставуваат нашите општини и државата на меѓународните натпревари – порача Герасимовски, посакувајќи им на учениците убава дружба, личен развој и успешни кариери.
Овој центар за талентирани ученици е прв во главниот град и има исклучително значење за талентираните ученици, кои немаат катче каде што може да ги развиваат и да ги усовршуваат своите талент, знаење и способности. Во ова катче, учениците ќе работат со своите наставници, трошоците за редовните комуналии за просторот (вода и Интернет), струјата и парното ќе ги намирува училиштето, а материјалните трошоци ќе ги покриваат трите општини заедно. Центарот за талентирани ученици ќе влезе и во креирањето на општинските буџети со цел талентираните ученици да го градат и да го развиваат својот талент и во наредните години. Општина Центар, исто така, обезбедува и одговорно лице, кое ќе се грижи за центарот, за тој да им служи уште многу години на учениците што поседуваат одреден талент.
