Вевчанскиот карневал по 20 години повторно е дел од Федерацијата на европски карневалски градови. Овој карневал е првиот од Македонија што стана член на оваа престижна федерација во 1993 година.
Според градоначалникот на Општина Вевчани, Спасе Кочовски, карневалот го изгубил статусот поради неплатена членарина.
– Со посветеност и напор, минатата година ги исплативме сите обврски за членарина од изминатите 20 години и во согласност со Одборот на ФЕЦЦ, од оваа година, Вевчани повторно е полноправна членка на Федерацијата на европски карневалски градови. По 20 години повторно е на вистинското место – истакна Кочовски.
Тој додаде дека преку членувањето во Федерацијата на европски карневалски градови, се врши промоција на карневалот, а со тоа и на Вевчани.
– Покрај промоцијата, Вевчанскиот карневал ќе биде дел од повеќе европски карневалски манифестации. Ние како Општина сме горди што сме дел од оваа значајна мрежа и со нетрпение очекуваме нови можности за соработка, размена на искуства и зајакнување на традицијата на нашиот уникатен Вевчански карневал – подвлече Кочовски.
Вевчанскиот карневал, кој е нематеријално културно наследство, стар околу 15 века, се одржува на 13 јануари напладне со дефиле на маски на двете василичарски друштва Горна и Долна маала. По својата автентичност и уникатност се разликува од другите карневалски манифестации. Покрај традиционалните маски со зет, невеста, ѓаволи и Глупави Августи неизостануваат маските инспирирани од актуелните политички и секојдневни случувања. Секое карневалско издание за вевчанци е доживување, тие ќе кажат сè, но до дефилето не откриваат во што ќе се маскираат.
