Претседателката на Собранието, Ана Брнабиќ, денеска ги распиша изборите во Белград за 2 јуни, по дводневни неуспешни преговори меѓу власта и опозицијата за изборните услови и препораките на ОДИХР.
Како што изјави Брнабиќ, распишувањето на изборите за советници на градското собрание на Белград за 2 јуни е нејзина законска обврска и додаде дека „по барање на опозицијата и експресното барање на претседателот Александар Вучиќ, одлучила овие избори да се одржат на најдоцниот можен датум кој е во согласност со Уставот и законите на Република Србија.
Брнабиќ истакна дека времето пред изборите го искористила да се обиде да започне дијалог со сите парламентарни политички чинители и да направи сѐ овие и сите последователни избори да се одржат во најдобар ред во согласност со демократските стандарди и ја покажат сериозноста и одговорноста што им ја должат на сите пред граѓаните на Србија.
„Мојата врата останува отворена за дијалог доколку има барем малку желба да им покажам на граѓаните на Република Србија дека понекогаш можеме заедно да работиме на работи кои се важни за граѓаните, без разлика на нивните политички афинитети“, рече претседателката на Собранието.
Таа на крајот ги повика сите политички партии и коалиции да се натпреваруваат во идеи и планови и да се погрижат изборната игра да биде фер и коректна.
Изборите беа распишани по преговорите што се водеа во рамки на собранискиот колегиум, на кои присуствуваа владејачките партии и опозициските коалиции „Србија против насилството“ и „НАДА“.
Како што соопшти денеска претседателката на Собранието, Владата не можела да го прифати предлогот за одржување на избори во исто време бидејќи тоа немало да биде во опсегот на законот.
