И побрзо од очекуваното, фудбалските фанови денеска ќе добијат шанса да уживаат во натпреварот кој е реприза на последниот финален дуел во најпрестижното клупско натпреварување, Лигата на шампиони. Бранителот на тронот, шпанскиот гигант Реал (М) на „Сантијаго Бернабеу“ ќе го нагости германскиот бундеслигаш Борусија од Дортмунд.
„Кралскиот клуб“ со денови е главна тема во спортските медиуми, но не поради резултатите туку поради францускиот интернационалец, Килијан Мбапе, кој по посетата на Шведска беше обвинет за силување. И покрај таквата ситуација се очекува Мбапе да го има главниот збор на зелениот терен и да биде главна опасност пред противничкиот гол.
Македонската јавност пак се надева дека е дојден моментот за да репрезентативецот, Бојан Миовски, го постигне првиот погодок во дресот на шпанска Џирона. „Црвено-белите“ денеска ќе го нагостат тимот на Слован Братислава, а се очекува Миовски да има солидна минутажа.
Големи се шансите италијанскиот калчо гигант Милан да ја запише првата победа во ЛШ затоа што избраниците на Пауло Фонсека за противник го имаат белгискиот преставник, Клуб Бриж.
Кога се во прашање утрешните девет натпревари од 3. коло, убедливо најголемо внимание привлекува пресметката помеѓу каталонскиот гигант Барселона и германскиот бундеслигаш Баерн (М).
Повторно на потребното ниво се очекува да бидат поранешните репрезентативци на Македонија, Аријан Адеми и Стефан Ристовски, а нивниот тим, хрватскиот претставник ќе се обиде во среда да го изненади австриски РБ Салцбург кој пак ќе се обиде да ја искористи предноста на домашниот терен.
ДЕНЕСКА НА ПРОГРАМАТА: Милан – Бриж, Монако – Црвена З., Арсенал – Шахтјор Д., Астон Вила – Болоња, Џирона – Слован Б., Јувентус – Штутгарт, ПСЖ – ПСВ, Реал (М) – Борусија Д., Штурм – Спортинг Л.
УТРЕ НА ПРОГРАМАТА: Аталанта – Селтик, Брест – Леверкузен, Атлетико (М) – Лил, Барселона – Баерн (М), Бенфика – Феенорд, Манчестер С. – Спарта П., РБ Лајпциг, Салцбург – Динамо З., Јанг Бојс – Интер.
