Американскиот државен секретар Ентони Блинкен денеска објави дека Украина е на „неповратен“ пат кон членство во НАТО, со што ги зголеми гаранциите дека на Киев ќе му биде дозволено да се приклучи на западната воена алијанса, но само откако ќе заврши нејзината војна со Русија.
Украинскиот претседател Володимир Зеленски се залагаше за цврсти гаранции од НАТО пактот, дека Украина ќе се приклучи на тој воен сојуз. САД и некои други земји се спротивставија на членството на Украина за време на тековниот конфликт со Русија, за да избегнат вовлекување на западните сојузници во поголема војна.
Тие исто така нагласија дека Украина мора да преземе значајни чекори во борбата против корупцијата, како и бројни други системски реформи. Рускиот претседател Владимир Путин долго време силно се спротивставува на обидот на соседна Украина да се приклучи на западната алијанса, нарекувајќи го тоа нарушување на безбедноста и интересите на Русија.
Генералниот секретар на НАТО во заминување Јенс Столтенберг претходно нагласи дека Украина нема да може веднаш да се приклучи на алијансата.
„За да поканиме нов сојузник да ни се придружи, потребен ни е консензус. Сите сојузници се согласуваат дека Украина ќе стане членка, но прерано е да се каже кога тоа ќе се случи“, изјави тој за новинарите.
