Тендерската постапка за 10-те километри на патниот правец Скопје – Блаце е во тек и компанијата наскоро ќе биде избрана. Според вицепремиерот за економски прашања, Фатмир Битиќи, и првите два километра од автопатот ќе бидат пуштени наредните недели.
– На барање на тие што аплицираа беше одложен крајниот рок неколку пати на тендерската постапка. Мислам дека наскоро ќе биде избрана и компанијата за 10-те километри. За двата километра е истата судбина како и секаде низ државата. За жал, јас сум кажал во неколку наврати дека во нашата земја недостигаат проектантски капацитети. Не навлегувам во тоа дали проектантските капацитети се такви затоа што има какви било намери, но имаше сериозни отстапувања од реалната состојба наспроти тоа што беше на хартија. И затоа заглави. Мислам дека наредните недели и тие два километри конечно ќе бидат пуштени – вели Битиќи.
Завршувањето на рехабилитацијата на патот Скопје – граничен премин „Блаце“ завчера го означија министерот за транспорт и врски Благој Бочварски и директорот на Јавното претпријатие за државни патишта Ејуп Рустеми, придружувани од вицепремиерот Артан Груби. Како што беше истакнато, изградбата на првите два километра е во завршна фаза и се очекува да бидат пуштени на крајот на март.
