За време на летниот преоден рок Дани Олмо се врати во редовите на Барселона која го купи од РБ Лајпциг за 55 милиони евра. Сепак, Барса и Олмо имаат големи проблеми. Играчот кој има 15 настапи и шест гола за каталонскиот гигант има серозен проблем кога е во прашање 2025 година. Имено, неговата регистрација од 1 јануари е под знак прашалник поради прекршување на одредбите поврзани со финансискиот фер-плеј.
Според информациите до кои дојде „АС“, Олмо има клаузула во договорот дека може да го напушти клубот на 1 јануари доколку не биде пријавен, но неговата иднина во Барселона се уште е сигурна. Клубот најде начин да ги собере потребните пари и го уверуваат дека ќе го регистрираат, не само до крајот на следната сезона или годината, туку до крајот на неговиот договор кој е со важност до летото 2030 година.
Планот на Барселона е да продава ВИП-пакети на новиот „Камп Ноу“, односно да продава седишта во ложата на подолг период. Долг е списокот на богати лица кои се заинтересирани за овие места, не само од Шпанија туку и од целиот свет. Со оваа акција клубот треба да заработи 120 милиони евра.
