Белорускиот лидер Александар Лукашенко се чини дека постигна престижна победа преговарајќи за договор меѓу рускиот претседател Владимир Путин и лидерот на приватната армија „Вагнер“ Евгениј Пригожин, но тој може да зажали, кога кај него ќе дојде лидерот на паравоената група, кој е во секој поглед незгоден, пишува АФП.
Во ненадејна изјава доцна во саботата, прес-службата на Лукашенка објави дека тој го поминал денот во разговори со Пригожин, со поддршка на рускиот претседател, за на крајот да го убеди шефот на „Вагнер“ да го прекине неговиот марш кон Москва и да се врати од каде што дошол.
Договорот претставува успех за Лукашенко, кој владее со неговата земја речиси 30 години и е отфрлен на Западот поради неговото жестоко задушување на постизборните протести во 2020 година и неговата поддршка за руската инвазија на Украина, објави агенцијата.
Шеесет и осумгодишниот шеф на државата, исто така, се соочува со мачни прашања за неговото здравје откако се појави во многу лоша состојба за време на церемонијата за одбележување на победата над Германија во Втората светска војна во Москва минатиот месец. Потоа исчезна на неколку дена.
На крајот, беше договорено Пригожин да замине во егзил во Белорусија, објави Кремљ, без да прецизира дали таму ќе однесе и членови на својата армија.
Телефонскиот разговор во кој, според белоруското претседателство, Путин му се заблагодарил на Лукашенко сигурно „им звучел како слатка музика на ушите на моќниците од Минск“, пишува агенцијата Франс прес.
Но, за Катја Глод, од Европската мрежа за лидери во Лондон, Лукашенко го презеде „жешкиот компир“ пред сè. „Мислам дека тоа не беше волја на Лукашенко. Мислам дека Кремљ го искористи“, изјави таа за АФП.
Неговото присуство во Белорусија ќе донесе „повеќе ризици“, додаде таа, во земјата каде што лојалноста на безбедносните сили е загрозена од изборите во 2020 година, кои предизвикаа протести и брутална пресметка.
„Единствената предност што белорускиот лидер може да ја искористи е да ги искористи луѓето на Пригожин како лична војска против евентуален бунт“, смета таа.
Идејата дека водачот на најпознатата група платеници во светот да се пресели во Белорусија, не ги воодушевува нејзините соседи.
Литванскиот претседател Гитанас Наузеда, чија земја е домаќин на самитот на НАТО следниот месец, предупреди дека алијансата треба да ги зајакне своите источни граници „доколку Пригожин или дел од групата Вагнер заврши во Белорусија со нејасни планови и намери“ се додава во текстот на АФП.
