Под мотото „Ако имаш место во срцето, имаш и во домот“, јавното претпријатие „Лајка“, започна со кампања со цел промоција на посвојувањето на кучињата скитници. Кампањата е дизајнирана да ја зголеми стапката на посвоени кучиња, но и да ја подигне свеста на јавноста за работата на „Лајка“.
Имајќи ја предвид алармантноста на бројката на бездомни кучиња на нашите улици, идејата е оваа кампања дополнително да ги привлече потенцијалните посвојувачи на кучиња и поддржувачи на иницијативата.
Кампањата „Ако имаш место во срцето, имаш и во домот“ на креативен начин ќе ја прикаже љубовта и лојалноста која кучињата ни ја даваат и преку употреба на интерактивни содржини, средби со поддржувачи и потенцијални посвојувачи, видеа, едукативни материјали, во континуитет ќе ги информира и едуцира граѓаните за придобивките од посвојувањето на бездомните кучиња.
Главната цел на кампањата е вдомување на што поголем број на бездомни кучиња и реален придонес кон решавање на овој проблем, со конкретни резултати на крајот од кампањата.
Согласно бројките од претпријатието, во просек месечно се вдомуваат 40 кучиња, минатата година се вдомени над 400 улични кучиња, а за оваа година се очекува бројката да биде уште поголема.
