Јавниот сектор мора да ги внесе податоците во регистарот, инаку не ќе може да исплаќа плата
По низа најави и одложувања, колку вработени има во јавната администрација, според министерот за информатичко општество и администрација, Дамјан Манчевски, ќе се знае до крајот на наредниот месец.
– До законски предвидениот рок, а тоа е крајот на март, МИОА ќе излезе со детален извештај за вработените во јавниот сектор. Да бидам искрен, оставивме повеќе простор заради состојбата во собранието, не можевме на време да го донесеме Законот и казните да се применуваат со малку одложено дејство. Но, како Министерство гарентираме дека на крај на март ќе излеземе со детален извештај, не само за бројката, туку со целосен извештај за јавниот сектор, рече Манчевски и додаде дека регистарот воспоставен пред две години, платен над два милиона евра не ги дава потребните информации бидејќи не бил дизајниран да го дава бројот на вработени.
Министерот не дава конкретен одговор дали ќе има отпуштања од работа, ако ова пребројување покаже дека има вишок вработени во јавната администрација.
Според него, моменталната ситуација е таква што од вкупно 1.303 институции од јавниот сектор, во регистарот што се води во МИОА податоци не внеле 259 и со нив активно се работи. Од нив 173 немаат побарано согласност од МИОА и немаат активна систематизација, а 86 не внеле податоци за вработените иако имаат одобрена систематизација.
Како што информираат Манчевски и директорката на Управата за јавни приходи Сања Лукаревска, на институциите им се дава рок од три месеци да да ги внесат податоците за своите вработени во инфоматичкиот систем за управување со човечки ресурси. Ако не го направат тоа, нема да можат да им исплатат плата на вработените, зашто, како што појаснува Лукаревска, при поднесување на пресметките ќе се појави грешка во системот на Управата за јавни приходи.
– Препорачуваме пред да почне примената на новите законски одредби, односно во претстојните три месеци работодавачите од јавниот сектор да извршат целосно пополнување на податоците во регистарот со што ќе се избегне појава на грешка при вршењето на контролата на податоците од страна на УЈП, изјави таа.
Манчевски вели дека целосно ажуриран и пополнет регистар ќе даде јасна слика за моменталната состојба во администрацијата, за бројот на слободни работни места, старосната структура, бројот на лица кои се пред пензија и многу други податоци.
– За пополнувањето на слободните работни места ќе може да се најде соодветен кадар кој ги исполнува потребните критериуми и ќе може да се преземе од трансфер листата. МИОА нема за цел да ги казнува институциите, но мора да обезбедиме регистар што конечно ќе ги содржи сите информации и ќе ја исполни улогата за која е скапо платен, рече тој.
Во следниот период секој вработен ќе има пристап до регистарот и ќе може да провери дали се внесени неговите податоци, ќе се организираат дополнителни обуки за институциите од јавниот сектор, ќе се побара реакција од Државниот управен инспекторат за раководителите на институциите кои не ги внеле податоците, а на веб-страницата на МИОА ќе бидат објавени сите оние институции кои ги немаат внесени податоците во регистарот.
(С.В.)
РАМКА
Н Институциите да им ги платат надоместоците на вработените
Министерот за информатичко општество и администрација Дамјан Манчевски им препорачува на институциите веднаш да им ги исплатат средствата за степен на кариера на вработените, а оние кои немаат пари, да се договорат со нив за динамиката на исплата. Исто така, ги повика институциите кои ги изгубиле сусдските спорови за овој проблем да не поднесуваат жалби, зашто така се трошат многу народни пари.
– Имавме заклучок на Влада во кој се дава препорака до институциите да ги исплаќаат надоместоците. Бараме раководните лица во институциите и вработените да седнат и да се договорат за динамиката на исплата на овие средства. Разбираме дека луѓето се ослободија и почнаа да ги бараат своите права, но исто така бараме разбирање од нив бидејќи преку ноќ во сите институции не ќе може да се исплатат овие средства. Во некои институции се работи за трошоци во висина од 10 проценти од нивниот буџет и сериозен е товарот што треба да го преземат, рече Манчевски.
