Во тек е големата еколошка акција во местото викано Рудина, во периферијата на село Чајле. Акцијата иницирана од страна на Месната заедница на село Чајле, наиде на широка поддршка меѓу жителите, бизнисмените и иселениците од село Чајле, како и од Општина Гостивар и локалните еколошки здруженија.
Камиони, трактори и соодветна механизација за чистење на теренот, од селаните и бизнисмените, ставени се на располагање за реализација на акцијата, најголема до сега во селото, и веќе меноста Рудина почна да го добива посакуваниот изглед. Во поддршка на акцијата, местото го посети градоначалникот на Гостивар, Арбен Таравари. Во изјава за медиумите, тој информираше дека има најави за слични активности и во други населени места, а Општина Гостивар ќе ги поддржи и ќе иницира акции за чистење на диви депонии на секој викенд.
– Чајле и Чегране, а во иднина верувам и други села, прават извонредна работа со вакви еколошки акции. Им се заблагодарувам на сите граѓани кои на разни начини даваат придонес за реализација на ваквите акции. Општина Гостивар во буџетот има предвидено по 2.000 евра за секоја месна заедница, за вакви и слични трошоци. Се надевам дека секој викенд ќе имаме по една акција – истакна Таравари.
Претседателот на месната заедница на село Чајле, Синан Елези објаснува дека теренот кој се чисти ќе се огради, ќе се постави табла за предупредување да не се фрла отпад, ќе се воведе дежурство и на местото ќе засадат дрвца.
– Во првите три дена направивме многу работа и продолжува со исто темпо. Местото ќе го оградиме и ќе се погрижиме да го одржуваме, а ќе засадиме и дрвца за да имаме чист воздух и да го зачуваме нашето здравје и здравјето на нашите деца – истакна Елези.
