Со предложените законски измени ќе се решат проблемите со вишокот на винско грозје преку пријавување на планираните количини на производство наменето за откуп, објавувањето на откупните цени пред почетокот на откупот, правилно мерење на шеќерните единици во откупот на винско грозје, редовна исплата на лозарите…
Со предложените измени на Законот за вино кои се во собраниска процедура се предвидува винското грозје да има стратешко значење како тутунот, да се квалификува виното како прехранбен земјоделски производ, да биде обезбеден организиран откуп и редовна исплата на откупените количини на грозје.
Кај лозарите постои извесен оптимизам дека со измените на Законот за вино ќе се решат голем дел од проблемите во врска со откупот и исплатата на грозјето. Во пресрет на верскиот празник Свети Трифун, кој се смета за заштитник на лозарите тие очекуваат исплата на заостанатите субвенции, неисплатено грозје од одделни винарници, дополнителните субвенции од два денари за килограм грозје продадено во домашни винарии, како и надоместокот за обесштетување од мрзнењето на лозјата.
– Потребно е винското грозје да има ист третман како тутунот, односно да биде стратешки производ, да има загарантиран откуп, а исплатата да биде неколку дена по откупот. Се додека не се решат овие работи проблемот со вишокот на грозје нема никогаш да се реши, истакна Љупчо Аризанов претседател на Регионалниот сојуз на лозарите “Агротиквешија#.
Тој додава дека и субвенциите на лозарите и преземеното винско грозје од винариите се уште не е целосно исплатено. – Има винарии кои целосно го имаат исплатено винско грозје, а има и такви кои постојано доцнат со исплатата, а ги немаат подмирено своите обврски кон лозарите и за неколку години, вели Аризанов.
И пратеникот Панчо Минов на трибината во Кавадарци на која се расправаше за измените на Законот за вино рече дека винското грозје треба да има третман на стратешко значење, да се квалификува виното како прехранбен земјоделски производ и да има обезбеден и организиран откуп и редовна исплата на откупените количини на грозје.
Во Законот за виното се уредуваат планирањето и управувањето со производствениот потенцијал за производство на винско грозје, производството на вино, пазарот и прометот со вино, класификацијата на вината, производството, означувањето и заштитата на вината со географски назив и описот, како и здружувањето на производители на вино.
Според сегашниот Закон за вино, винското грозје не е дефинирано како земјоделско-прехранбен производ од стратешко значење и не е прецизирано управувањето и планирањето со производството, прометот и откупот на винското грозје за преработка и производство. Имено пазарот на понудата и побарувачката на винско грозје за производство на вино често се нарушени со појави на вишок на винско грозје за откуп, неблаговремено објавување на откупните цени, диктирање на ниски откупни цени, неправилности во мерењето на шеќерноста при откупот и ненавремена исплата на откупените количини на винско грозје.
Со предложените законски измени ќе се решат проблемите со вишокот на винско грозје преку пријавување на планираните количини на производство наменето за откуп, објавувањето на откупните цени пред почетокот на откупот, правилно мерење на шеќерните единици во откупот на винско грозје, редовна исплата на лозарите, воведување на директни плаќања како финансиска поддршка на производителите на винско грозје и вино и заштита на вината кои носат ознака на географски назив на виногорието.
Исто така, виното ќе добие стратешко значење на прехранбен производ, ќе се преземаат мерки за планирање и управување со производниот потенцијал и организирање на пазарот на винското грозје наменето за откуп и производство на вино, како и за извоз на истото.
(А.С.)
